رحلة الخروج من الكويت

سبحان الله كيف الواحد مرات بنتحس ببلد معينة أكتر من باقي البلاد.
اليوم كان أخر يوم إلي بالكويت, بتزكر أول طيارة بحياتي كان المفروض أركبها للكويت إلتغت و أنا بالمطار بماليزيا و رموني بفندق كان بخوّف و مليان حشرات غريبة فكانت نعم البداية. اليوم ركبت آخر طيارة الي من الكويت, كان المفروض أوصل عالساعة ١١ الصبح بس وصلت عالساعة ٦ المسا. بعد ما أخّرونا ساعة و ركّبونا الطيارة ولا همة بقولولنا انزلوا الطيارة خربانة و بدها تصليح, بعد كمان ٤ ساعات رجعوا طلّعونا و راحوا فينا على عُمان بدل أبوظبي قال تغيير بسيط بالوجهة ... بسيط بعقل؟المهم .. أنا و الكويت خلص ... طلاق بائن من غير رجعة.
بس الواحد و هو مسافر بشوف عجايب :)
كان معنا عالطيارة واحد زلمة بلديّاتنا, قاعد بالصف اللي قدامي عالشمال, جارر ورا مرتو و اسم الله ٤ ولاّ ٥ ولاد , كان كل ما يصير وقت انو نعطي التذاكر أو الجوازات يعطي الوراق لأصغر عكروت يركض فيهم للكاونتر عبين ما باقي اخوته يشلّوا حركة الطابور , بس عجبتني الاستراتيجية و التكتيك و صرت بدي أجيب ولاد بس عشان أدربهم زيهم.
وبس ركبنا الطيارة تاني مرة و قاعدين بنستنى ولاّ هو بنادي عالمضيف قال موبايلي ما عم بشتغل, راح المضيف أعطى موبايله من باب الزوق أو الهبل, فاااا راح أخده و اتصل مكالمة دولية ١٠ دقايق و صار يحكيلهم الفصة شو صار من أول ما اجى المطار. المضيف حسيته صفرن يا حرام و ما رجع بيّن بنفس الممر ههههههه.
بعدين بس وزعوا السماعات أبو الشباب فتح الشاشة اللي قدامو على قناة فيديو كليبات على نجوى كرم و أغنيتها السقعة 'عم بمزح معك' و دخل بالجو و علّى الصوت عالآخر و رجع كرسيه لورا, بعد شوية انتبهت انو ماسك مسبحة بايدو و عم بسبّح وهو عم ببحلق بالشاشة, كمان مرة أُعجبت بالاستراتيجية الزلمة عم بمحي سيّئاته أوّل بأوّل.
آآآآآآآآخر شي لما الطيارة نزلت مرتو يا حرام ابصر شو صارلها و مسكت كيس و صارت تراجع بصوت عالي و المرة روحها عم تطلع و هو بكل برادة طال موبايله و صفن يكبس في, حلوة سياسة 'و أنا مالي'. بعدين بس الطيارة وقفت و هيّه لساتها عم تطلع روحها وقف بالممر و قلها "ااااايييييييييش ؟ ااااااايييييييش مالك؟ قومي ل نلحق" ومشي.
أنا دااااااري ...؟